चंद्रपूर:- बल्लारपूर पोलिस ठाण्याच्या हद्दीत येणाऱ्या गावातील एका अल्पवयीन मुलीवर ३० वर्षीय वनरक्षकाकडून जंगलात नेऊन अत्याचार केल्याची धक्कादायक घटना उघडकीस आली आहे. ही घटना ५ ऑगस्ट रोजी घडली असून आरोपी वनरक्षक सध्या फरार आहे.व त्या वनरक्षकाच्या शोधार्थ पोलीस दिवस रात्र एक करीत आहेत.
प्राप्त माहितीनुसार, पीडित अल्पवयीन मुलगी कॉलेज सुटल्यानंतर आपल्या मित्रासोबत चंद्रपूरहून गावाकडे जात होती. दरम्यान, त्यांची दुचाकी रस्त्यात बंद पडल्याने दोघेही ती दुरुस्त करत असताना एक वनरक्षक चंद्रपूरहून कारवा येथे जात असताना त्यांच्या जवळ थांबला. त्याने मुलीच्या मित्राला दमदाटी करत तुला खोट्या केस मध्ये अडकवतो असे म्हणत पैसे मागितले. त्यानंतर त्या अल्पवयीन मुलीला तुला पुढच्या गावापर्यंत सोडतो असे सांगून चंद्रपूर-जुनोना मार्गावरील जंगलात नेले आणि तिच्यावर जबरदस्ती केली. नंतर आरोपीने घटनास्थळावरून पलायन केले.
पीडित मुलीने ही माहिती आपल्या मित्राला दिली. त्यानंतर तो तिला घरी घेऊन गेला व घडलेली घटना तीने आपल्या पालकांसमोर कथन केले तेव्हा तीला समवेत घेऊन पालकाने बल्लारपूर पोलीस ठाण्यात तक्रार दिली. पोलीसांनी आरोपी वनरक्षकाविरुद्ध अप.क्र. ५९२/२५ नुसार भादंवि कलम ३०८ (२), १३७ (२), ६४ (१), ६५ (१) बीएनएस अंतर्गत गुन्हा दाखल केला आहे. आरोपीची ओळख पटली असून त्याचा शोध सुरू आहे.
सदर प्रकरणाचा तपास पोलीस निरीक्षक बिपिन इंगळे यांच्या मार्गदर्शनाखाली महिला पोलीस उपनिरीक्षक करिष्मा मोरे, पोहवा यशवंत कुमरे, मपोअं खडसे हे करत आहेत. ही घटना अत्यंत संतापजनक असून आरोपीस लवकरात लवकर अटक व्हावी, अशी मागणी नागरिकांकडून करण्यात येत आहे.
