माओवादी नेते माडवी हिडमा यांच्या गाण्यावर नृत्य सादर केल्याप्रकरणी पुणे पोलिसांनी गडचिरोलीतील दोन विद्यार्थ्यांवर केला गुन्हा दाखल.
पुणे:-विश्रांतवाडी येथील सरकारी मुलांच्या वसतिगृहात आयोजित सांस्कृतिक कार्यक्रमादरम्यान, माओवादी नेते माडवी हिडमा यांच्यावरील गाण्यावर आधारित नृत्य सादर केल्या प्रकरणी पुणे पोलिसांनी इतरांबरोबरच पुण्यात शिकणाऱ्या गडचिरोलीतील दोन विद्यार्थ्यांवरही गुन्हा दाखल केला आहे.
उपनिरीक्षक शब्बीर शेख यांनी विश्रांतवाडी पोलीस ठाण्यात तक्रार दाखल केली. आरोपींमध्ये गडचिरोली जिल्ह्यातील दोन बीबीए विद्यार्थ्यांसह इतर सहभागींचा समावेश आहे. त्यांच्यावर शत्रुत्व वाढवणे, राष्ट्रीय एकात्मतेला बाधा आणणारी वक्तव्ये करणे आणि सार्वजनिक उपद्रव निर्माण करणे या गुन्ह्यांसाठी भारतीय न्याय संहितेच्या तरतुदींनुसार गुन्हा दाखल करण्यात आला आहे.
हे प्रकरण या महिन्याच्या सुरुवातीला भारतरत्न डॉ. बाबासाहेब आंबेडकर शासकीय मुलांच्या वसतिगृहात आयोजित केलेल्या एका सांस्कृतिक कार्यक्रमाशी संबंधित आहे. या कार्यक्रमादरम्यान, नऊ विद्यार्थ्यांच्या एका गटाने कथितरित्या एका रिमिक्स ट्रॅकवर नृत्य सादर केले, ज्यामध्ये ‘ओ रे बंदूक वाले’ या गाण्याचा समावेश होता. पोलिसांच्या दाव्यानुसार, या गाण्यात माओवादी कमांडर माडवी हिडमा यांना गौरवशाली पद्धतीने चित्रित करण्यात आले होते.
डॉ. बाबासाहेब आंबेडकर यांच्या १३५ व्या जयंतीनिमित्त आयोजित सोहळ्याचा भाग म्हणून ६ ते १४ एप्रिल दरम्यान ‘झाडे वाचवा’ या संकल्पनेखाली हा कार्यक्रम आयोजित करण्यात आला होता. या कार्यक्रमाचा व्हिडिओ सोशल मीडियावर प्रसारित झाल्यानंतर वाद निर्माण झाला, ज्यामुळे काही उजव्या विचारसरणीच्या गटांनी आक्षेप घेतला आणि पोलीस चौकशी सुरू झाली.
व्हिडिओची पडताळणी केल्यानंतर, पोलिसांनी पुण्यातील एका महाविद्यालयात बीबीए (सीए) अभ्यासक्रमाचे शिक्षण घेत असलेल्या आणि वसतिगृहात राहणाऱ्या २२ आणि २३ वर्षीय दोन विद्यार्थ्यांवर गुन्हा दाखल केला.
बंदी घातलेल्या सीपीआय (माओवादी) आणि तिच्या पीपल्स लिबरेशन गुरिल्ला आर्मीचा वरिष्ठ कमांडर माधवी हिदमा याच्यावर दोन दशकांहून अधिक काळ सुरक्षा दलांवर अनेक हल्ल्यांचे सूत्रधार असल्याचा आरोप होता आणि त्याच्यावर १ कोटी रुपयांचे बक्षीस होते. नोव्हेंबर २०२५ मध्ये आंध्र प्रदेशात सुरक्षा दलांसोबत झालेल्या चकमकीत तो ठार झाला.
प्राथमिक चौकशीदरम्यान, विद्यार्थ्यांनी पोलिसांना सांगितले की, त्यांना हिडमाच्या पार्श्वभूमीबद्दल माहिती नव्हती आणि विदर्भ प्रदेशात लोकप्रिय असल्यामुळे व त्याचे संगीत आकर्षक असल्यामुळे त्यांनी ते गाणे निवडले होते. त्यांनी असेही सांगितले की, त्यांची वेशभूषा बिरसा मुंडा आणि बाबूराव शेडमाके यांसारख्या आदिवासी स्वातंत्र्यसैनिकांपासून प्रेरित होती.
समाजकल्याण विभागाच्या अधिकाऱ्यांनी सांगितले की, प्रथमदर्शनी हे कृत्य हेतुपुरस्सर वाटत नाही, तर वसतिगृह प्रशासनाने गाण्याची निवड अनवधानाने झाली असावी असे म्हटले. तथापि, पोलिसांनी सांगितले की, माओवादी कमांडरशी संबंधित गाण्यावर सादरीकरण करणे हे राष्ट्रीय एकात्मता आणि सार्वभौमत्वाला धोका निर्माण करू शकते आणि पुढील तपास सुरू आहे.
