सहलीसाठी निघालेल्या विद्यार्थ्यांच्या बसला अपघात झाल्याने शिक्षणाधिकाऱ्यांनी काढले परिपत्रक
नागपूर:- शाळेच्या सहलीसाठी निघालेल्या बसला झालेल्या अपघाताच्या पार्श्वभूमीवर शिक्षणाधिकाऱ्यांनी परिपत्रक काढले आहे. त्यानुसार, सहल काढण्यासाठी मुख्याध्यापकांना १०० रुपयांच्या बॉण्ड पेपरवर सुरक्षेची हमी लिहून द्यायची आहे. या परिपत्रकामुळे शाळा व्यवस्थापनांमध्ये सहल काढावी की नाही, यावरून संभ्रम निर्माण झाला आहे.
शंकरनगर येथील सरस्वती विद्यालयाद्वारे आयोजित सहलीसाठी निघालेल्या बसचा अपघात होऊन त्यात एका विद्यार्थिनीचा मृत्यू झाला. तर, चाळीसहून अधिक जण जखमी झालेत. अपघाताची दखल घेत शिक्षणाधिकारी (माध्यमिक) रोहिणी कुंभार आणि शिक्षणाधिकारी (प्राथमिक) सिद्धेश्वर कळुसे यांनी परिपत्रक जाहीर केले आहे. यानुसार, शाळांना एका वर्षात एकच शैक्षणिक सहल आयोजित करता येणार आहे. विद्यार्थ्यांना सहलीला येण्याची सक्ती करता येणार नाही.सहलीसाठी विद्यार्थी व पालकांचे संमतीपत्र अनिवार्य असेल. तसेच सहभागी विद्यार्थ्यांची यादी व संपर्क क्रमांक संमतीपत्रासोबत संलग्न असावे, शाळा व्यवस्थापन समिती/शाळा समिती यांच्या संमतीचा ठराव घेवूनच सहलीचे आयोजन करण्यात यावे, सहलीसाठी दहा विद्यार्थ्यांमागे एक या प्रमाणात शिक्षकांची संख्या असावी, विद्यार्थ्याच्या संरक्षणाची सर्व जबाबदारी संबंधित विद्यालयाचे मुख्याध्यापक तसेच सहलीतील सर्व शिक्षक यांची राहील, सहलीस विद्यार्थिनींचा सहभाग असल्यास महिला शिक्षिका सोबत असणे अत्यावश्यक आहे, सहलीसाठी खासगी बसेसचा उपयोग करता येणार नाही, महाराष्ट्र राज्य परिवहन महामंडळाच्या बसनेच सहल न्यावी, सहलीचा नियोजन आराखडा तयार करताना पालकांशी चर्चा करावी, सहलीत प्रथमोपचार पेटी सोबत असावी आदी मार्गदर्शक तत्त्वे परिपत्रकामध्ये देण्यात आली आहे.
विद्यार्थ्यांना एकटे सोडणे पडणार महागात.
सहलीला आलेल्या विद्यार्थ्यांना एकटे व नजरेआड फिरण्यास सोडू नये. सहलीतील सहभागी कोणीही तंबाखू, गुटखा, तसेच मादक पदार्थ सेवन करू नये, असे या परिपत्रकात स्पष्ट करण्यात आले आहे. शाळेच्या निष्काळजीपणामुळे अपघात झाल्यास तसेच विद्यार्थ्यांच्या जीवितास धोका झाल्यास संबंधित शिक्षक, मुख्याध्यापक यांच्यावर नियमानुसार गरज भासल्यास कायदेशीर कारवाई करण्यात येईल. सहलीच्या नियोजित मार्गामध्ये बदल करण्यासाठी तशी परवानगी घ्यावी लागणार आहे.
उंच पर्वत टेकड्या,नदी नाले व तलावाच्या ठिकाणी सहल नेता येणार नाही.
विद्यार्थ्यांची शैक्षणिक सहल नेण्यापूर्वी दोन प्रशिक्षित शिक्षकांच्या मार्गदर्शनाखली सहलीबाबत संपूर्ण माहिती देण्यासाठी तसेच आपात्कालीन परिस्थिती उद्भवल्यास बचाव करण्याचे प्रशिक्षण विद्यार्थ्यांना द्यावे लागेल, असे परिपत्रकात म्हटले आहे. त्याशिवाय, रात्रीचा प्रवास टाळावा, समुद्र, अतिजोखमीचे पर्वतावरील ठिकाण, नदी, तलाव, विहिरी, तसेच व उंच टेकड्या अशा विद्यार्थ्यांच्या जीवितास धोका होईल अशा ठिकाणी शैक्षणिक सहलीचे आयोजन करता येणार नाही.
