सिंधुदुर्ग:- मुख्यमंत्री देवेंद्र फडणवीस यांच्या सिंधुदुर्ग दौऱ्यात राजशिष्टाचाराचे उल्लंघन झाल्याने जिल्हा प्रशासनाने कडक पावले उचलली आहेत. दौऱ्यावेळी राजशिष्टाचार न पाळल्याने दोन तलाठ्यांना निलंबित करण्यात आले आहे. तसेच, सुरक्षेतील त्रुटी आणि नियंत्रण योग्यरित्या न ठेवल्याबद्दल अप्पर जिल्हाधिकारी, पोलीस अधीक्षक आणि उपविभागीय महसूल अधिकाऱ्यांना कारणे दाखवा नोटीस बजावण्यात आली आहे.
राजशिष्टाचाराचे उल्लंघन; तलाठी गेले होते मुख्यमंत्र्याच्या भेटीला.
सहाय्यक महसूल अधिकारी एस. पी. हांगे आणि ग्राम महसूल अधिकारी व्ही. व्ही. कंठाळे या दोघांनी मुख्यमंत्री देवेंद्र फडणवीस यांच्या दौऱ्यावेळी राजशिष्टाचार पाळला नाही. त्यांना मुख्यालयात राहण्याचे आदेश असतानाही त्यांनी आदेशाचे उल्लंघन केले आणि मुख्यमंत्र्यांच्या भेटीला गेले. छत्रपती शिवाजी महाराजांच्या पुतळ्याच्या पूजन आणि दर्शनासाठी आलेल्या मुख्यमंत्र्यांची या दोन्ही अधिकाऱ्यांनी भेट घेतली होती. यावर ठाकरे शिवसेनेचे माजी आमदार वैभव नाईक यांनी नाराजी व्यक्त करत लाचलुचपत प्रतिबंधक कारवाई झालेल्या या दोघांनी मुख्यमंत्री देवेंद्र फडणवीस यांचा सत्कार केला असा आरोप केला होता. तसेच मुख्यमंत्र्यांच्या कार्यालयात तक्रार केली होती.यानंतर जिल्हाधिकारी अनिल पाटील यांनी दोघा तलाठ्यांना निलंबित केले.
