ऐन पोळा सणाच्या दिवशी शासकीय आश्रमशाळेतील पहिल्या वर्गातील विद्यार्थ्यांचा नाल्यात बुडून मृत्यू; पोळा सणाच्या सुट्टीवर घरी आला होता विद्यार्थी.
भामरागड (गडचिरोली):– ऐन पोळा सणाच्या दिवशी एक हृदयद्रावक घटना समोर आली आहे. गडचिरोली जिल्ह्यातील भामरागड तालुक्यातील कोयर गावातील ६ वर्षीय रिशान प्रकाश पुंगाटी हा शासकीय आश्रमशाळेतील सुट्टीनिमित्त घरी आला होता. मात्र, गावालगतच्या नाल्याजवळ खेळताना तो वाहून गेल्याने त्याचा मृत्यू झाला. या घटनेने गावात शोककळा पसरली आहे.
मिळालेल्या माहितीनुसार, रिशान हा लाहेरी येथील शासकीय आश्रमशाळेत पहिल्या इयत्तेत शिकत होता. पोळा सणासाठी दोन दिवसा पुर्वी त्याचे वडील प्रकाश पुंगाटी यांनी त्याला गावी आणले होते. २१ ऑगस्ट रोजी दुपारी रिशान गावालगतच्या नाल्याजवळ खेळायला गेला. बराच वेळ तो घरी परत न आल्याने गावकऱ्यांनी शोधमोहीम राबवली, पण त्याचा थांगपत्ता लागला नाही. दुसऱ्या दिवशी, २२ ऑगस्ट रोजी सकाळी महसूल प्रशासन आणि गावकऱ्यांनी पुन्हा शोध घेतला असता, रिशानचा मृतदेह नाल्यात आढळला. सध्या मोकापंचनामा आणि शवविच्छेदनाची प्रक्रिया सुरू आहे, अशी माहिती वरिष्ठ अधिकाऱ्यांनी दिली.
भामरागड तालुक्यातील तिसरी घटना
गडचिरोली जिल्ह्यात १८ ऑगस्टपासून सुरू असलेल्या मुसळधार पावसामुळे नदी-नाले तुडुंब भरले आहेत. भामरागड तालुक्यातील ही तिसरी दुर्घटना आहे. यापूर्वी १८ ऑगस्ट रोजी खंडी नाला ओलांडताना १९ वर्षीय लालचंद कपिलसाय लकडा आणि जोनावाही गावातील शिक्षक असन्तु सोमा तलांडी हे सिपनपल्ली नाल्यात वाहून गेले होते. नाल्यांवर पूल नसल्याने स्थानिक आदिवासींना जीवघेणा प्रवास करावा लागत आहे, याबाबत स्थानिकांनी संताप व्यक्त केला आहे.
