
आयएएस अधिकारी तुकाराम मुंढे यांची 19 वर्षात 23 वेळा बदली.
मुंबई:- महाराष्ट्र सरकारने पाच भारतीय प्रशासकीय सेवा (IAS) अधिकाऱ्यांच्या बदल्यांचे आदेश जारी केले आहेत. यामध्ये काही महत्त्वाच्या पदांवर अधिकाऱ्यांच्या नियुक्त्या करण्यात आल्या आहेत. विशेष म्हणजे कर्तव्य कठोरतेमुळे कायम चर्चेत असलेले,धडाडीचे आयएएस अधिकारी आणि सततच्या बदली सत्रामुळे चर्चेत असलेले अशी ओळख असलेल्या तुकाराम मुंढेंची यांचीही पुन्हा एकदा बदली करण्यात आली आहे.
यानुसार, २००५ बॅचचे आयएएस अधिकारी तुकाराम मुंढे यांची असंघटीत कामगार आयुक्तपदावरून बदली करण्यात आली असून आता राज्याच्या दिव्यांग कल्याण विभागाचे ते सचिव असतील. विशेष म्हणजे तुकाराम मुंढे यांची मागील 19 वर्षात तब्बल 23 वेळा बदली करण्यात आली आहे. प्रशासनात काम करताना नियमांवर बोट ठेवून काम करणारे तुकाराम मुंढे हे कोणत्याही सत्ताधाऱ्यांना पंसत नसल्याचं दिसून येतंय. राजकीय नेतृत्वाला, मंत्र्यांना आपल्या मनाप्रमाणे नियमबाह्य गोष्टी करण्यामध्ये तुकाराम मुंढे यांच्यासारखे अधिकारी अडथळे ठरतात. त्यामुळे नियमानुसार सर्वसाधारणपणे तीन वर्षात बदली होणे अपेक्षित असताना तुकाराम मुंढे मात्र सरासरी एक वर्षेच काम करताना दिसून येतात.
दरम्यान, तुकाराम मुंढे यांच्यासह आणखी चार आयएसएस अधिकाऱ्यांची बदली करण्यात आली आहे. नितीन काशीनाथ पाटील यांची महाराष्ट्राच्या राज्य कराचे विशेष आयुक्त आणि अभय महाजन यांची मुंबईत महाराष्ट्र राज्य कापूस उत्पादक विपणन महासंघाचे व्यवस्थापकीय संचालक म्हणून बदली करण्यात आली आहे.
पाच आयएएस अधिकाऱ्यांची बदली
1) तुकाराम मुंढे (IAS:RR:2005) विकास आयुक्त (असंघटित कामगार), मुंबई यांना सचिव, दिव्यांग कल्याण विभाग, मंत्रालय, मुंबई म्हणून नियुक्त करण्यात आले आहे.
2) नितीन काशीनाथ पाटील (IAS:RR:2007) व्यवस्थापकीय संचालक, महाराष्ट्र राज्य कापूस उत्पादक विपणन महासंघ, मुंबई यांना विशेष आयुक्त, राज्य कर, महाराष्ट्र, मुंबई म्हणून नियुक्त करण्यात आले आहे.
3) अभय महाजन (IAS:NONSCS:2007) विशेष आयुक्त, राज्य कर, महाराष्ट्र, मुंबई यांना व्यवस्थापकीय संचालक, महाराष्ट्र राज्य कापूस उत्पादक विपणन महासंघ, मुंबई म्हणून नियुक्त करण्यात आले आहे.
4) ओंकार पवार (IAS:RR:2022) सहाय्यक जिल्हाधिकारी, इगतपुरी उपविभाग, नाशिक यांना मुख्य कार्यकारी अधिकारी, जिल्हा परिषद, नाशिक म्हणून नियुक्त करण्यात आले आहे.
5) आशा अफजल खान पठाण – सहसचिव, मुख्यमंत्री सचिवालय, नागपूर यांना महासंचालक, वनमती, नागपूर म्हणून नियुक्त करण्यात आले आहे आणि त्यांना सहसचिव, मुख्यमंत्री सचिवालय, नागपूरचा अतिरिक्त कार्यभार देण्यात आला आहे
.