👉सिरोंचा तालुक्यातील मद्दीकुंठा येथील अवैध वाळू साठ्याप्रकरणी २९ कोटी ३६ लाख रुपयांचा दंड.
👉जिल्हाधिकारी अविश्यांत पंडा यांचा वाळू तस्करांना दणका.
👉जप्त केलेल्या मध्ये १५,६६५ ब्रास अवैध वाळू साठ्यासह १ पोकलैंड मशीन, २ जेसीबी मशीन आणि ५ ट्रक जप्त.
सिरोंचा(गडचिरोली):- जिल्ह्यातील सिरोंचा तालुक्यात सुरु असलेल्या अवैध वाळू तस्करीची बाब विविध माध्यमानी लावून धरल्यानंतर जिल्हाधिकारी अविश्यांत पंडा यांनी तात्काळ दखल घेत सहाय्यक जिल्हाधिकारी तथा उपविभागीय अधिकारी कुशल जैन यांना चौकशी करण्याचे निर्देश दिले होते. निर्देशानुसार कुशल जैन यांच्या पथकाने ०२ ऑक्टोंबर रोजी अंकिसा माल, चिंतरेवला व मद्दीकुंठा येथे तपासणीची कारवाई केली. यावेळी अंकिसा माल येथे सर्व्हे नंबर ९०८ मधील वाळू साठ्यात ६४ ब्रास आणि सर्व्हे नंबर ६९० व ६९१ मधील साठ्यात ५९ ब्रास वाळूची तफावत (कमी साठा) आढळली आहे. या दोन्ही प्रकरणात चौकशी करण्यात येत आहे.
मद्दीकुंठा येथील सर्व्हे नंबर ५३३ मध्ये परवानगी असलेल्या ठिकाणी भेट देऊन पाहणी केली असता वाळूसाठा दुसऱ्याच जागेवर म्हणजेच सर्व्हे नंबर ३५६ जागेवर असल्याचे आढळले. मोजमाप अहवालानुसार, या ठिकाणी एकूण १५ हजार ६६५ ब्रास वाळूसाठा आढळून आला. साठवणूक आणि वाहतुकीसाठी संबंधितांकडे कोणताही वैध परवाना उपलब्ध नसल्यामुळे हा साठा अवैध घोषित करून जप्त करण्याची कार्यवाही करण्यात आली.
याशिवाय, वाळू उत्खनन व वाहतुकीसाठी वापरण्यात आलेली १ पोकलैंड मशीन, २ जेसीबी मशीन आणि ५ ट्रक ही वाहने देखील जप्त करण्यात आली आहेत. जप्त केलेल्या १५,६६५ ब्रास अवैध साठ्यासाठी प्रति ब्रास १८,६०० दंड (पेनल्टी) प्रमाणे एकूण अंदाजित रक्कम २९ कोटी ३६ लाख ५६ हजार ८०० रुपये दंड प्रस्तावित करण्यात आला आहे.
अंतिम सुनावणी आणि अपीलाच्या अधीन राहून दंडाची रक्कम निश्चित केली जाईल, असे सहाय्यक जिल्हाधिकारी कुशल जैन यांनी स्पष्ट केले. या कारवाईनंतर सिरोंचा परिसरातील अवैध रेती तस्करांमध्ये एकच खळबळ उडाली आहे.
